2. Благаслаўлю Госпада на ўсякі час, заўжды хвала Яму ў вуснах маіх.

3. Госпадам будзе хваліцца душа мая, няхай пачуюць лагодныя і ўзвесяляцца.

4. Велічайце Госпада са мною і ўзнясём імя Яго разам.

5. Я шукаў Госпада, і Ён пачуў мяне, і ад усіх бед маіх збавіў мяне.

6. Прыступіце да Яго і прасвятліцеся, і абліччы вашы не будуць пасаромлены.

7. Вось, убогі паклікаў, і Гасподзь пачуў яго, і ад усіх бед яго збавіў яго.

8. Будзе на варце Ангел Гасподні вакол тых, што баяцца Яго, і ўратуе іх.

9. Зведайце і ўбачыце, які добры Гасподзь; блажэнны чалавек, які спадзяецца на Яго.

10. Бойцеся Госпада, усе святыя Яго, бо не маюць нястачы тыя, што баяцца Яго.

11. Багатыя збяднелі і згаладаліся, а тыя, што шукаюць Госпада, не зведаюць нястачы ні ў якім дабры.

12. Прыйдзіце, дзеці, паслухайце мяне, страху Гасподняму навучу я вас.

13. Які той чалавек, што хоча жыць і жадае бачыць добрыя дні?

14. Стрымлівай язык свой ад зла і вусны свае ад каварных слоў.

15. Ухіляйся ад зла і рабі дабро; шукай міру і імкніся да яго.

16. Вочы Госпада – на праведных, і вушы Яго – да малітвы іх.

17. Аблічча ж Госпада супраць тых, хто робіць зло, каб знішчыць на зямлі памяць пра іх.

18. Паклікалі праведныя, і Гасподзь пачуў іх, і ад усіх бед іх збавіў іх.

19. Блізкі Гасподзь да скрушаных сэрцамі і пакорлівых духам Ён уратуе.

20. Многа бед у праведных, і ад усіх іх збавіць іх Гасподзь.

21. Захоўвае Ён усе косці іх, і ніводная з іх не зламаецца.

22. Смерць грэшнікаў лютая, і хто ненавідзіць праведнага, тыя грашаць.

23. Збавіць Гасподзь душы рабоў Сваіх; і не саграшаць усе, хто спадзяецца на Яго.